Jemi të lumtur të shpallim përfituesit e Heritage Space VII!
Këtë edicion, Heritage Space pranoi rreth 40 aplikacione, të cilat u vlerësuan me kujdes nga një komision profesional i vlerësimit. Falënderojmë secilin aplikant për projekt propozimet e tyre.
Komiteti i vlerësimit të këtij viti përbëhej nga:
- Kaltrina Krasniqi – Regjisore dhe Hulumtuese
- Piro Rexhepi – Autorë dhe PhD në Shkenca Politike
- Lira Blakaj – Antropologe dhe studente PhD
- Lulzim Zeqiri – Artist Multidiciplinarë
- Dafina Halili – Gazetare dhe Redaktore në K2.0
Edicioni i këtij viti sjell projekte që ndërthurin trashëgiminë kulturore me:
- Arkivimi i Shkëputjeve
- Trashëgimia e Krizave
- Rrëfim & Interpretim
Gjeni listën e plotë të përfituesve më poshtë:
DIELLZA SALICANA
“UDHËTIMI I KOHËS NË KOHË” – Një instalacion interaktiv që u bën homazh artefakteve kulturore dhe fetare të paruajtura në Kosovë. Frymëzuar nga një traditë lokale në kalanë e Artanës, projekti përdor vargje rrotulluese të tjegullave të rikrijuara për të përfaqësuar rëndësinë historike të këtyre objekteve, si dhe rreziqet e neglizhimit të ruajtjes së tyre.
ELISA MAXHUNI & TRINGA SEFEDINI
“ZHURMIMI GJURMËVE” – Një instalim i zërit në shtypshkronjën historike Rilindja, që rikrijon atmosferën e saj plot jetë të viteve ‘70 – ‘90. Përmes peizazheve zanore dhe historive gojore, ky instalim kërkon të krijojë një përvojë dinamike ndijore, duke u lidhur thellë me trashëgiminë e pasur të ndërtesës dhe duke frymëzuar ndjenja të nostalgjisë dhe vlerësim të përkushtimit që dikur jehoi nëpër hapësirat e saj.
GRESA NUREDINI
“NJË ARKIVË FOTOGRAFIKE E NARRATIVAVE KOLEKTIVE” – Një dokumentim vizual i fuqisë transformuese të dashurisë në kolektiv nëpërmjet një eksplorimi ontologjik të gjendjes njerëzore gjatë kohërave të shtypjes politike dhe shoqërore. Projekti synon të shfaqë një botëkuptim delikat të viteve 1990-1999 (para-dhe-gjatë luftës) përmes arkivave personale fotografike te mbledhura në një libër dhe ekspozitë; duke stimuluar narrativa reflektuese mbi ndërthurjen e dashurisë dhe kujtesës kolektive si trashëgimi kulturore.
KRESHNIK ARIFI
“DIÇKA PO NDODH…” – Një projekt multimedial që synon të sjellë një ndërthurje të audios dhe videos në një nga hapësirat e Tulltores në Prishtinë. Projekti do të zbulojë një përrallë imagjinare të një punëtori që lundron në hapësira paradoksalisht të kundërta, duke ftuar shikuesit të rimendojnë punëtorin e ngujuar në kohë, në pritje të ekzistimit të funksionalitetit, duke pasqyruar gjendjen arkitekturore të Tulltores dhe kujtesën kolektive rreth saj.
LIRIDONA SIJARINA
“SHOQËRIMI PËRMES KAFES TEK GRATË” – Një projekt kërkimor që hulumton dikotominë publike-private përmes perspektivës së përvojave të grave, duke u fokusuar në strukturën shoqërore brenda shtëpive dhe dinamikën e kulturës së kafesë si politikë solidarizimi dhe shoqërizimi. Ky projekt synon eksplorimin e agjencisë së grave, ndikimet e migrimit të detyruar dhe ndryshimet në ndjenjën e tyre komunale të përkatësisë dhe strukturat mbështetëse, duke ofruar kështu një kuptim të nuancuar të përvojave të jetuara të grave.
Heritage Space ofron një mundësi për të punuar në ruajtjen e trashëgimisë kulturore nëpërmjet hulumtimit, dokumentimit dhe interpretimit. Kjo platformë, përmes MENTORIMIT PROFESIONAL dhe mbështetjes teknike, inkurajon qasjet inovative në trajtimin e trashëgimisë kulturore, për të nisur dhe vazhduar diskurset për të kaluarën në të tashmen si dhe të ardhmen.