Nol Binakaj është Zëvendësdrejtor i Zyrës dhe Koordinator i Programit për Rijetësim Adaptiv të Ndërtesave dhe Lokaliteteve Historike në Fondacionin Kosova Trashëgimia Kulturore pa Kufij  – CHwB Kosova, ku është i angazhuar aktivisht që nga viti 2005. Ai ka udhëhequr dhe koordinuar projekte të shumta të fokusuara në konservimin dhe rijetësimin adaptiv të ndërtesave të rëndësishme vernaculare, publike dhe fetare në mbarë Kosovën, duke kontribuar ndjeshëm në revitalizimin e mjediseve historike.

Fokusi i tij profesional qëndron në rigjenerimin dhe planifikimin urban, me theks të veçantë në angazhimin qytetar, metodologjitë pjesëmarrëse dhe proceset e udhëhequra nga komuniteti. Binakaj është gjithashtu anëtar themelues i Fondacionit Kosovar të Arkitekturës (KAF) dhe ka qenë pjesë e ekipit multidisiplinar që u shpërblye me grantin “Keeping It Modern” të Getty Foundation për hartimin e Planit të Konservimit dhe Menaxhimit të Bibliotekës Kombëtare të Kosovës.

Ai mban diplomë në Inxhinieri të Arkitekturës nga Universiteti i Prishtinës dhe ka përfunduar trajnim profesional të specializuar në Konservimin dhe Menaxhimin e Ndërtesave Historike në Universitetin e Lundit, Suedi. Në vitin 2016, ka shërbyer si nominues i Kosovës për Çmimin Aga Khan për Arkitekturë. Në vitin 2017, është përzgjedhur si Bursist i Programit Hubert H. Humphrey / Fulbright dhe ka zhvilluar kërkime shkencore në Massachusetts Institute of Technology (MIT), Departamenti për Studime Urbane dhe Planifikim, SHBA.

Nol Binakaj është anëtar i ICOMOS dhe Do.Co.Mo.Mo. International.